börn á 300 II

Ég sendi fyrirspurn til Umboðsmanns barna vegna spurninga minna um 5 og 7 ára börn á 300 myndinni sem ég sá á lau.. Samkvæmt svari hans skilst mér að ég hefði getað hringt á lögregluna sem bæði hefði átt að tala við forsjármann og bíóhúsið. Eins mega aðeins 14 og eldri vera í fylgd með fullorðnum á bönnuðum myndum. Þá veit ég það. Ég sendi líka bíóhúsinu(Sam bíóin) bréf um þetta allt og vona að þeir lagi þetta.

En þarna voru líka um tuttugu 10 ára strákar, ekkert eftirlit greinilega. 

Athugasemdir

[Pétur Björgvin, 27.3.2007 kl. 15:35]

,,átt að tala við" - er það ekki meinið, eru nokkur viðurlög - viljum við viðurlög?

[SM, 27.3.2007 kl. 19:21]

þetta á að vera í lagi hjá bíóunum. Annars get ég sett inn svar umboðsmanns.

[SM, 27.3.2007 kl. 21:24]

Komdu sæl Sylvía

 

Í erindi þínu til umboðsmanns barna, dags. 25. mars, spyrð þú hver beri ábyrgð á því að börnum, ca. 5 og 7 ára, sé hleypt inn á sýningu kvikmynda sem bannaðar eru börnum yngri en 16 ára. 

 

Foreldrar bera fyrst og fremst ábyrgð á velferð barna sinna og þeim ber, eftir því sem í þeirra valdi er, að vernda börn gegn ofbeldis- og klámefni eða öðru slíku efni, m.a. með því að koma í veg fyrir aðgang þeirra að því.

 

Samkvæmt lögum um eftirlit með aðgangi barna að kvikmyndum og tölvuleikjum nr. 62/2006 sem tóku gildi í júlí 2006 er bannað að sýna ungmennum undir lögræðisaldri ofbeldikvikmyndir eða kvikmyndir sem ógna velferð barna: 

 

2. gr. Aldursmörk og matsskylda.
Bannað er að sýna börnum undir lögræðisaldri ofbeldiskvikmyndir og -tölvuleiki, sem og kvikmyndir eða tölvuleiki sem ógna velferð þeirra. Bönnuð er sýning, sala og önnur dreifing á slíku efni til barna sem hafa ekki náð lögræðisaldri.
Meta skal allar kvikmyndir og tölvuleiki sem ætlaðir eru til sýningar, sölu eða annarrar dreifingar hér á landi fyrir börn undir lögræðisaldri með tilliti til þess hvort leyfa beri eða takmarka sýningu, notkun eða afhendingu á slíku efni við tiltekið aldursskeið innan lögræðisaldurs. Sama gildir um ítarefni sem dreift er með kvikmyndum og tölvuleikjum og kynningarefni fyrir kvikmyndir og tölvuleiki.
Skylda skv. 2. mgr. hvílir á þeim aðilum sem framleiða kvikmyndir eða tölvuleiki til sýningar eða sölu hér á landi, eða hafa kvikmyndir eða tölvuleiki til sýningar, leigu, sölu eða annarrar dreifingar, í atvinnuskyni hér á landi. Sömu aðilar skulu gæta þess að aðgangur að sýningum og afhending á kvikmyndum og tölvuleikjum sé í samræmi við ákvæði þessarar greinar.

 

Skv. 5. mgr. 3. gr. laganna má þó hafa allar kvikmyndir til sýningar opinberlega fyrir börn sem náð hafa 14 ára aldri, enda horfi þau á myndina í fylgd foreldris eða forsjáraðila.

 

Kvikmyndahúsin sem sýna kvikmynd sem metin er ekki við hæfi barna yngri en t.d. 16 ára bera því ábyrgð á því að börnum yngri en 14 ára sé ekki hleypt inn á sýningu hennar – þá skiptir ekki máli hvort börnin séu ein eða í fylgd forsjáraðila. Ef kvikmyndahúsin virða ekki þessi ákvæði þá er það lögreglu og barnaverndarnefnda að taka á því.

 

Í 95. gr. barnaverndarlaga nr. 80/2002 segir að barnaverndarnefndir skuli eftir föngum fylgjast með almennum aðstæðum barna. Sjái barnaverndarnefnd ástæðu til að ætla að óæskilegir umhverfisþættir, svo sem framboð á vafasamri afþreyingu eða óheftur aðgangur að ofbeldisefni, hafi neikvæð áhrif á umhverfi barna skal nefndin koma ábendingum á framfæri við þá sem málið varðar eða hlutast sjálf til um úrbætur eftir atvikum.

 

Kær kveðja,

f.h. umboðsmanns barna,

Auður Kristín Árnadóttir