María Mey

25.mars er Boðunardagur Maríu og þar af leiðir eru 9 mánuðir til jóladags.

Hér er texti dagsins, Lk.1.46-55 og ör-predikun mín þennan dag:

Og María sagði: Önd mín miklar Drottin,

og andi minn gleðst í Guði, frelsara mínum.

Því að hann hefur litið til ambáttar sinnar í smæð hennar, héðan af munu allar kynslóðir mig sæla segja.

Því að mikla hluti hefur hinn voldugi við mig gjört, og heilagt er nafn hans.

Miskunn hans við þá, er óttast hann, varir frá kyni til kyns.

Máttarverk hefur hann unnið með armi sínum og drembilátum í hug og hjarta hefur hann tvístrað.

Valdhöfum hefur hann steypt af stóli og upp hafið smælingja,

hungraða hefur hann fyllt gæðum, en látið ríka tómhenta frá sér fara.

Hann hefur minnst miskunnar sinnar og tekið að sér Ísrael, þjón sinn,

eins og hann talaði til feðra vorra, við Abraham og niðja hans ævinlega.

Galilea fyrir 2000 árum síðan: Ung kona verður barnshafandi.

Hún María sem eflaust hafði um annað að hugsa þau misserin, en hún var föstnuð manni og brúðkaup eflaust á næsta leyti, fær óvænt heimsókn engilsins sem færir henni þau tíðindi að nú sé henni treyst fyrir því að ala son Guðs, sjálfan Messias sem þjóð hennar hafði lengi beðið.

María eins og aðrir þekkti sögur ritningarinnar. Hún þekkti sögurnar af venjulegu fólki sem var kallað til mikilla hluta; Davíð sem var fjárhirðir þegar hann er valinn konungur. Móse sem stamaði en varð leiðtogi þjóðar sinnar. Og Esther sem varð drottning og bjargaði þjóð sinni. Nú beinist kastljósið að stúlkunni Maríu. Kallið er komið.

Aðstæður eru kannski ekki þær bestu, hún er enn ekki gift og viðurlög voru við því að eiga barn utan hjónabands. Hver mun trúa henni? Hún þekkir enga hliðstæðu.

Nokkru fyrr hafði hún frétt af óvanalegum aðstæðum frænku sinnar, Elísabetar sem var orðin barnshafandi á gamals aldri. Elísabet var trúkona mikil og því fer María til hennar, ,,með flýti" einsog textinn segir, eflaust til að leita ráða.  Og um leið og þær hittast fær María þá staðfestingu sem hana vantaði, barnið í kviði Elísabetar tekur gleðikipp og Elísabet staðfestir orð engilsins.

Maríu er létt, svona ætlar Guð að hafa þetta. - Hinir síðustu verða fyrstir og hinir fyrstu síðastir. - Guði er enginn hlutur um megn. -

Guð valdi venjulega konu til að alast upp hjá, hann valdi venjulegt fólk til að búa hjá, eins er það enn í dag, hann velur venjulegt fólk til að búa og dvelja hjá.

María er fyrrimynd trúaðra, hún treystir Guði sama hverjar aðstæðurnar eru og hún gleðst yfir blessun hans. Einsog hún  segir í lofsöng sínum.,,Miskunn (Guðs) við þá, er óttast hann, varir frá kyni til kyns."

 

- málverk no.1 eftir Ivan Koulakov.